Leseprobe: Blechschmidt, E neier Tog

Grüne Kließ kontra Spätzle

Mei Mutter hatt in ihre Redensarten aah dan Satz: "Fremms Brot is'n Kinnern Sammel!" Dos mog stimme, un aah net. Vür zwee, drei Gahrne hatten mir Urlauber aus dr Stuttgarter Gegnd. Ich gelaab Nägelein habn die Leit gehaaßen. Es hot e paar Tog gedauert, eh mer danne Nägelein ihr Sproch verstanden habn. Do wollt ne mei Mutter e schiene Frahd machen. Se sat ze daare Frau Nägelein: "Mir könne Ihne sist nischt wetter bieten: Mei Ma hot daare Woch enn Hosenbock geschlacht. Do habn mir gedacht, mir machen emol fer Sie e richtig aarzgebirgisch Assen, wos sog ich, e Staatsassen: grüne Kließ aus Aardäppeln vun Nachber senn Fald un derzu Hosenbroten aus unnern Stall." Dos habn sich die fremme Leit gefalln lossen. Un wall mei Mutter egal wieder dervu geredt hot, wos dos fer e gutes Assen is, habn se sich aah miet drauf gefraht. Dos war e Gahd fer unner Mutter! Die war doch waagn ihre grünn Kließ weit un braat bekannt. Ganz wisplig war'sche, denn nu sollt dos aah de Stuttgarter Gegnd erfahrn. Ne Sunntig früh hatt se e frischgestärkte Schürz ümgebunden un hot in Schrank von ganz hinten Töpp vürgeraimt, die se sist schunt, domit kaa Emaille ogeschlogn werd. Un eh die Urlauber zen Frühstück kame, warn langk de Aardäppeln geschölt, geriebn, un dr Voter hatt de Ärmeln nooch hinten gewickelt un dan Taag in Kließsackel ausgequetscht. E schie Füderle Taag, wos do in dr Schüssel log. Meine Leit dachten: Un wenn's dan Nägeleinleiten noch esu schmeckt. An de grünn Kließ soll's net faahln. Dran Tisch sat mei Mutter: "Lossen Se sich's besser schmecken als is!" un war gespannt, wie ihr feines Assen akumme werd. Indassen hot dr Voter e Flasch Bier ausgeschenkt. "Scheniern Se sich fei net! Lange se zu! Es sei soot Kließ do!" hot mei Mutter gesat. Oder die Leit habn in dan Assen rümgestochert, när is Flaasch gassen un die Kließstückle egal hie un haar gewendt. Dos hot menn Leiten gar net gefalln. Se habn oder nischt gesat. Nooch'n Assen sat mei Mutter ze daare Frau Nägelein, die miet aufgewaschen hot: "Sie habn oder sparsam gassen. Es hot Ihne gewieß net geschmeckt?" Do sat die: "O doch!" Un nooch'r Walle: "Aber wissen Sie, die Klöße, daß Sie die Klöße vertragen? Die liegen einem ja wie Stein im Magen!" Do drüber kunnten sich meine Leit när wunnern, wu doch de Mutter extra Sammelbrösele neigebacken hatt. Unner grußer Gung, dr Kurt, daar hot sich über die Nägeleinleit net gewunnert. Wie daar gegn Morgn aus dr Disko haamkam, hot'r sich über die siebn Kließ un zwee Hosenbaanle haargemacht un dernooch aah noch de Pfann ausgeputzt. Wall sich die Urlaaberfraa net zefrieden gob, emol e schwaabische Kost ze kochen, gob's e paar Tog spöter Spätzle, e gruße Schüssel voll Spätzle. Aagntlich warn dos nischt wetter als braate Nudeln. Oder die Leit habn geta, als wärn Spätzle is Himmelreich of Aarden. Ich hob's unnern Voter agesaah: Die Spätzle warn net sei Sach. Er sat, üm dan Leiten de Frahd net ze verdarbn: "Nu ja, ganz schie. Mer ka's schu assen!" Wie se ben Nägelein oder nort hintendraußen in Sunnestuhl logn, sat'r: "Fraa, wann aß mer dä ze Mittog?" Un die sat: "Nu sollt mer die Kließ hobn, die se daare Woch ben Nägelein stiehgelossen habn."